بركات علية القوم.. نستعرض لكم الجزء الخامس من سلسلة النصب علي بركات الشهيرة، ضمن هاشتاج #اتنصب_عليك_ازاي والذي تم طرحه من قبل جروب “فيس بوك” الشهير “جت في السوستة”، لمنع التعرض للنصب والإحتيال.
ويمكنكم قراءة جميع المواقف التي تعرض لها بركات عبر موقعنا، ومشاهدة البث المباشر الذي يحكي فيه عن كيفية الوقوع في فخ عمليات النصب المتكررة.
شاهد ايضاً: بركات رايح الكويت علي السريع الجزء السابع من سلسة اتنصب عليك ازاي “ابو النيل”
بركات حوالة ويسترن السعودية اتنصب عليك ازاي
علية القوم فى يوم كنت رايح استلم حوالة من السعودية على شركة وسترن و طبعا بستلم بالدولار مع إنى كنت دايما أقول لخالتى ابعتيها بالمصرى و ترد تقولى عيش، إحساس علية القوم صحيح كنت بستلم و بعدين الف اغير و اتمرمط بس إحساس علية القوم دا جميل الصراحة، المهم فى اليوم دا استلمت و رحت أغير الفلوس عملت ٧٠٠٠ جنيه و انا مستنى دورى فى مكتب الصرافة دخل راجل شيك كدة و شكله ابن ناس فعلا تحس ان دا فعلا من علية القوم مش بيمثل، و ماسك فى إيده شنطة شكلها يخطف العين و الله دخل للراجل بتاع الصرافة بشكل مباشر رغم أن فى واحد واقف فعلا على الشباك.
و قبل ما يتكلم أو ينطق بكلمة كان مخى ترجم على طول أن الشنطة دى مليانة دولارات روزم روزم، و إن الراجل ده مش من الناس اللى ينفع تستنى أصلا، مخى ترجم الكلام ده ف جزء من الثانية اول ما الراجل نطق عرفت أنه شامى لبنانى سورى فلسطينى المهم أنه من أهل الشام، ودب إيده ف الشنطة و توقعت بقى أنه هيطلع اول روزمة خضرا، لقيته راح مطلع إزازة برفان.
يهمك ايضاً: القصة الكاملة لـ بركات وابو النيل “بخاخة حنكش” تريند السوشيال ميديا
برفان علية القوم
و فهمت من كلامه أنه بيبيع البرفان اللى معاه و محتاج فلوس طبعا انا قاعد مليش علاقة بالموضوع لحد ما بدأ يشاورله اتجاه باب المحل ببص لقيت مراته و معاها بنوتة حوالى ٥ سنين و عربية بيبى فيها طفل فى حدود سنتين، و فهمت أنه ممعوش فلوس يدفع الإيجار و لا يأكل ولاده بدأت أركز أكتر سمعته بيقوله دا برفانات من أعلى المركات العالمية، و أنه جايبهم من باريس و هو نازل بشنط التوكيلات بتاعتهم بس حصله ظروف فى مصر و إضطر يبعهم بأى تمن، طبعا بعد كل ده موظف الصرافة مرضيش يشترى حاجة و الراجل خرج يا عينى مكسور و انا قلبى بيتقطع عليه و على عياله.
وقفت على شباك الصرفة ونص وشى ناحية الباب عشان أشوفه مشى فى انهو اتجاه و دماغى فيها صوتين عاليين صوت قلبى بيقولى لازم تقف جنبه و صوت خالتى و هى بتقولى عيش إحساس علية القوم، برفانات أصلية من باريس مش اسانس شادية ابو ١٤ جنيه اللى شبه الريحة اللى بيرشوها فى المقابر، المهم قفشت الفلوس من ايد الموظف و طيرت عشان ألحق الراجل.
بلف وشى اول ما خرجت لقيتهم واقفين ممشيوش اصلا فرحت جدا و روحت داخل عليه وسع بقى فى الحتة دى ملعبى، قولتله أنا آسف بس انا سمعتك غصب عنى و احنا اخوات انت عاوز تعمل ايه، قالى معايا برفانات تمنهم الفعلى يعدوا ال ١٨ ألف جنيه ٧ أزايز فيهم إتنين بس بحوالى ١٠ آلاف و كلهم بشنط شركتهم اللى فى باريس قولتله طيب لازم كلهم على بعض قالى لازم عشان ايجارى و اكل ولادى طيب انت عاوز فيهم كام قالى ٨٠٠٠ أولا أنا مش خبرة فى مجال العطور عشان اعرف دا أصلى و الا مضروب بس شكل العلب و الشنط و تقفيلة العبوات لا يمكن تكون مضروبة ثانيا انا اصلا ممعيش المبلغ ده قولتله بص انا كل اللى معايا ٧ بس و لا يمكن أصلا هشتري بيهم كلهم انا هشترى على أدى بص انا هاخد منك ب ٣٠٠٠ موضوع علية القوم دا فشخنى ف دماغى.
سلسلة النصب علي بركات علية القوم
الراجل كان مهذب بشكل غير طبيعى و الله قالى شوف انت انسان طيب و خيِّر و كفايا انك حسيت بيا و جيت تجرى ورايا عشان تساعدنى، و لأنك طيب زود ال ٣ خليهم ٤ و خدهم كلهم و والله ما وفيتك حقك، بس ٤ يادوب يغطوا الأزمة عندى فعلا و بدأ يقولى مش هقول عنك و لا هشكر فيك لكن أنا بفهم كويس فى معادن الناس و أنه اكيد راح نتقابل تانى و مش بعيد يكون فى فرنسا و احنا بنشترى نفس العطور تانى من مكانها الأصلى.
أديتله الفلوس و أخدت الشنطة و اتمشينا كام خطوة بدردش معاه و مراته و البنوتة الصغيرة و البيبى ورانا لقيته بيقول يا كرم الله شايف محل العطور هناك، بالله يا أخى ادخل من غيرى لأن أنا شكلى واضح انى جايب العطور معى من الخارج، لكن انت ادخل أسأل عن تمنهم و عن مصداقية أنهم برفانات أصلية تخيلوا هو اللى بيتحايل عليا عشان ادخل أتأكد، بينى و بينكم قولت ادخل أتأكد، قالى احنا هون مكان ما راح تتركنا و ابتسامة وشه و هدوءه انا أصلا داخل و أنا متأكد و الله و لكن ليطمئن قلبى ابتسمت فى وش الراجل اللى بيبيع البرفان.
و قولتله لو سمحت شوفلى البارفانات دى كدة، قالى مالها ؟ قولتله عاوز أتأكد بس انها أصلية و الا مضروبة الراجل طلع الأزايز و فردهم كدة على الريون و قالى بابتسامة كدة مش كل الحاجات دى أصلية، قلت فى دماغى و المصحف انت شكلك حمار، يعنى ايه مش كل الحاجات ؟ ايه المصطلح دا أصلا، قالى الشنط بس هى اللى أصلية لكن البرفانات كلها مضروبة السبعة ميعملوش ٥٠٠ جنيه.
يعنى ايه الكلام ده قالى دا ماء تواليت درجة تالتة، يعنى انا اشتريت ب ٤٠٠٠ جنيه ماء تواليت، طبعا إحساس علية القوم فى اللحظة دى بدأ ينهار و بدأت أكره خالتى نفسها، سبت الأزايز و الشنط و طلعت أجرى على الراجل و عياله أختفوا، أسأل الناس اللى فى الشارع و لا حد شافهم أصلا،رجعت أخدت الحاجات و طلعت على البيت و دى كانت الكارثة الأكبر، مراتى مستنية ٧٠٠٠ جنيه ملهاش هى علاقة بموضوع علية القوم ده 🤣 قلبت من حوارى بولاق فى ثانية الا تلت، و اتفضحت فضيحة اللحمة فى السوق، بقالى ٣ سنين كل ما حمايا يشوف وشى يقولى معاكش حاجة فرنساوى اصلى.
