كل مايخص تجهيز و تسليم البحث ورقياً والكترونياً | تنويه هام للطلاب واولياء الأمور

بناءً علي تكرار علامات الاستفهام حول كيفية تسليم البحث ، وتجهيزه قبل التقديم سواء بالطريقة الورقية او الالكترونية عن طريقة منصة ادمودو التعليمية، سوف نذكر ونجيب علي كل اسئلة اولياء الأمور والطلاب، حول تجهيز وتسليم البحث يدويا والكترونيا، باللهجه العامية.

كيفية تسليم البحث

الناس اللي لسة محتارة وبتسأل بالنسبة للمجموعات اللي اشتغلت في البحث طالب واحد بس من المجموعة هيرفع البحث بتاعه على منصة edmodo ويكتب أكواد زمايله اللي معاه في البحث في التفاصيل وهو بيرفع البحث، يعني لو ٥ أفراد عملوا البحث للصف الخامس الإبتدائي مثلا البحث هيترفع مرة واحدة فقط مش ٥ مرات.

الناس اللي كتبت بخط الايد يتسلم زي ما هو للإدارة ولو تقدروا وعندكوا الإمكانيات انكوا تكتبوه إلكتروني يبقى أفضل.

سؤال مهم أوي من أولياء الأمور

ابني يكتب البحث بخط ايديه ولا انا اكتبه له عادي وردي كالتالي:-

تسليم البحث الكترونيا منصة ادمودو

• هو لو ابن حضرتك راح المدرسة يمتحن ودخل اللجنة كان حد هيروح يكتب له ولا هو هيجاوب لوحده وبنفسه وبخط أيديه هو 🛑الناس اللي بتسأل هطبع البحث وأسلمه ورقي في المدرسة طالما سياتك طبعته يعني مكتوب إلكتروني، يبقى تحفظه pdf وترفعه على المنصة على طول.
• لو كتبت البحث وورد عشان تحوله pdf هتعمل الخطوات البسيطة التالية Save as Type — choose pdf وبس كدا، هتبقى حفظت الملف بصيغة pdf.
• واللي كتبه على الموبايل يقدر يحوله برده بسهولة باستخدام اي برنامج من الآفات البرامج المجانية الموجودة على google play.
• طيب لو كتبته بخط الايد وعايد تحوله pdf وترفعه على المنصة عشان متروحش المدرسة ممكن تستخدم برنامج سكانر على الموبايل هتصور بس الورق كويس وتحفظه pdf من خلال البرنامج ده وبرده هتلاقي برامج مجانية كتير جدا على google play.

شاهد ايضاً: خطوات تسليم البحث عبر منصة ادمودو التعليمية 2020 | شرح وزير التربية والتعليم

تسليم بحث مدارس اللغات

• بالنسبة لمدارس اللغات ومسألة اللغة الأفضل طبعا البحث يكتب بلغة دراسة الولاد ولكن الوزير قال مسألة اللغة لا تهمنا ونقبل كل اللغات المهم المحتوى وجهد الطالب.
• بالنسبة للطلاب اللي ناويين يسلموا مشروعات الأبحاث ورقيا إلى المدارس، كل اللي انت محتاجه إنك تكتب البحث بالورقة والقلم على قد ما تقدر، وتشتري ظرف، وتحط البحث في الظرف وتروح تسلمه للمدرسة.
• وتكتب عليه الرقم التعريفي اللي هو الكود اللي بيجي بالرقم القومي والصف الدراسي، ولو انت فئة خاصة (أولى ثانوي، تانية ثانوي، طالب دمج، طالب تربية خاصة) اكتب ده على الظرف من بره، وأوعى تكتب اسمك على الظرف من بره.

تسليم البحث ورقياً

1. تسليم البحث ورقيا في ظرف للمدرسة، مش محتاج إنك تكون دفعت المصروفات، ولو المدرسة رفضت وطلبت فلوس ما تدفعش جنيه واحد واشتكي للإدارة التعليمية علشان ده حقك.
2. واخر معاد لتسليم البحث 16 مايو، والرفع على المنصة هيكون جاهز من يوم ٩ مايو في أيقونة خاصة بالأبحاث ٢٠١٩/٢٠٢٠.

تنويه للطلاب واولياء الأمور

ملحوظة بكررها تاني وتالت وعاشر كل الأبحاث الاسترشادية اللي احنا نشرناها لحضراتكم ديه فقط للاسترشاد بها وليس للنقل او الطباعة لان الوزارة لن تقبل الأبحاث المنقولة او المكررة.

النماذج دي فقط تساعدك عشان تعرف البحث هيتعمل ازاي وطريقة تنسيقه وترتيب عناصره ونماذج لمحتواه والمراجع كتير عند الطلاب أولهم كتاب المدرسة وبنك المعرفة المصري والمكتبة الرقمية study.ekb …..إلخ.

1. ارجوكم ارجوكم للمرة المليون خالوا ولادكم يجتهدوا ويعملوا الأبحاث بنفسهم مش ولي الأمر اللي يعمله ولا المدرس اللي عايز فلوس ولا السايبر ولا اي مكتبة في الشارع بتستغلكوا بلاش تضيعوا ولادنا ابنوا مستقبلهم.
2. الوزارة حريصة على بناء مستقبلهم وعقلهم وفكرهم وخطوة خطوة الكل هيستوعب ويقدر بجدارة.
3. خللوا ولادنا يبدعوا ويبقوا مبدعين ومبتكرين ويبعدوا عن الصم والحفظ، اللي احنا نشأنا عليه بالتوفيق لولادنا جميعًا يارب خالص تحياتي.