حلقات مسلسل ما وراء الطبيعة كاملة ، نذكر لكم في هذا التقرير المفصل مراجعة لأحداث وحلقات مسلسل التريند الأول في العالم العربي للدكتور الراحل احمد خالد توفيق، والذي يتم عرضه حاليا علي شبكة نتفليكس، والذي اثار ضجة كبيرة علي منصات التواصل الإجتماعي، عقب عرض أولي حلقاته، وقد تعمدت سرد احداث القصة بالعامية، حتي يتسني للقاريء فهمها بسلاسة ووضوح.
حلقات مسلسل ما وراء الطبيعة كاملة
لو ناوي تتفرج على مسلسل ما وراء الطبيعة أول مسلسل مصري من انتاج نتفلكس ومتردد.. تعالى وأنا أحكيلك عن المسلسل في السريع بدون حرق بكتب الكلام ده وأنا في حالة نشوة محستش بيها من شهور.
روحي حاليًا غارقة في تفاصيل عالم المسلسل “اللي بحاول أتعامل معاه كعمل منفصل عن الروايات”، اسمحولي وأنا لسه في جزوة حماسي اكتبلكم رأيي مبدئي في كل حلقات المسلسل، الرأي ده هيكون عاطفي شوية ومش هيكون موضوعي أوي، أنا بس هحاول أسجل انطباعاتي اللي قد تتغير في المشاهدة التانية. قبل أي حاجة هتكلم عن الساوند تراك في المسلسل.. قد ايه هي عظيمة وسلسلة وجميلة وخطفت قلبي كذا مرة في المسلسل.
الحلقة الأولي أسطورة البيت
حلاوة اللقاء الأول.. يا الله.. لك أن تتخيل احساسي وانا عمال أرقاب شخصيات الروايات وهي بتتحرك قدامي وبراقب إنفعالاتهم وبنني انطباعات عنهم.. الحلقة طلعت زاي ما كنت متخيلها.. مشاعر متفجرة.. أنا دمعت تلت مرات في الحلقة دي.. وضحكت مرتين ومكنتش عايزها تخلص.
احمد أمين “رفعت إسماعيل”
احمد أمين هو رفعت إسماعيل بلا منازع ومستحيل أتخيل حد كان ممكن يحقق ربع اللي حققه للشخصية، أعيب عليه بس عدم ظهور الجانب المتدين منه ماجي أو رزان جمال، أنا اشتريت من أول مشهد. وباقي الشخصيات كلها معنديش مشاكل معاه، الأطفال بس كان تمثلهم مش قد كده، بس مضيقونيش، كنت شايف إن تمام قشطة. ولاف يو يا شيراز والله. ولا مشهد للابد وحتى تحترق النجوم.. أنا عيطت كتير يا جماعة،
الحلقة الثانية أسطورة لعنة الفرعون
كان في كروتة شوية مش هكدب عليكم.. بس الكروتة دي هيحس بيها بس اللي قرا الرواية فلو انت مقرتهاش مش هتضايق.. الحلقة دي مش بقوة اللقة الأولى طبعًا بس فيها الجرافيك فيها كان كويس وملامح العالم بدأت تبان أكتر.. وبدأت اركز مع التصوير وجماله والكادرات، التلوين في المسلسل عمومًا كان مرضي بنسبة 70% وصورة أنضف من 90% من الأفلام المصرية وأنضف من شغل عالمي والله.
الحلقة الثالثة اسطورة العساس
بصوا.. كل حاجة حلوة.. وتمام.. وزاي الفل.. بس الجرافيك بتاع العساس كان سيء.. ودي مشكلة عامة في إنتاجات نتفلكس في المواسم الأولى.. واللي شاف زا ويتشر فاكر مشهد التنين أكيد.. فهي مشكلة ميزانية غالبًا.. بس عارف؟.. أنا شاري.. والله أنا شاري لأجل باقي الشغل العالي ده. وشخصية لوي اللي ظهرت في الحلقة دي.. اداني انطباع ناجح أوي.. هو الانطباع اللي كنا محتاجينه بالظبط للشخصية دي.. لأنها شخصية مهمة جدًا.
الحلقة الرابعة اسطورة النداهة
من الظلم مقارنتها بالرواية لأن الرواية هتكسب طبعًا.. لكنها فعلًا لهبطتني وخلتني ألف حوالين نفسي.. وفيها مشهد في الأخر قهرني يا جدعان.. مكنتش أحلى حاجة بس حلقة مقبولة.
الحلقة الخامسة أسطورة الجاثوم
الحلقة دي هي مرحلة الإنهيار والشك في الخط الدرامي لأي بطل، هي بطلنا بيبدأ يشكل معتقداته وافكاره من جديد. الحلقة دي فيها شوية مشاهد حلوة أوي.. لكن مشكلة الحلقة الحقيقة إنك لو قريت الرواية هيكون صعب أوي عليك تقبلها.. هيكون صعب عليك تقبل التغيرات اللي حصلت وشكل الجاثوم في الحلقة.. بس أنا حبتها وكنت عارف غنها ضرورية علشان تاخدنا لنقطة النهاية.
الحلقة السادسة أسطورة العودة للبيت
الحلقة دي هايلة جدًا بالنسبالي وخصوصًا إنها بتحكيلنا قصة مختلفة شويتين عن بتاعت الروايات، أنا شايف إن الخطوط اتلمت صح في الحلقة دي، وكل الورق اتلم.. يمكن في تفاصيل اتكروتت وانت بتلم خيوط حبكة المسلسل كلها بس في النهاية عمرو سلامة نجح في إنه يعمل خط يربط بيه كل الأساطير بخيط واحد.. خيط هايل.. وكان بس ناقص كلمة السر.. وكلمة السر كانت موجودة في إجابة سؤال رفعت في الحلقة دي.. ليه أنا؟ الإجابة يا جماعة خلت جسمي ينتفض في مكانه وكنت هقوم أسقف.. اللي قرأ السلسلة كاملة هيعرف إنه يا الله هي دي أفضل قافلة ممكنة وتمهيد للجزء التاني والكام مشهد اللي في الأخر بيحضرونا لجزء أول أنا واثق إنه هيحتوى على حكايات عظيمة واحداث أقوى من الجزء الأول اللي كان مجرد تمهيد للأساطير الحقيقة.. الخلاصة.. العمل مش أفضل حاجة في الدنيا.. بس أنا مكنتش أتمنى أفضل من كده.. أنا حسيت إن الروح دبت تاني في مغامرات دكتور أحمد خالد توفيق الله يرحمه وإنه عايش وسطنا.. المسلسل دافي أوي.. مرعب.. ساخر.. مليان مشاعر.. الخلطة الصعبة بتاعت ما وراء الطبيعة متحققة بنسبة أكتر من 60%.. الطريقة اللي اترجمت بيها السلسلة لعمل درامي هي أفضل طريقة كنت ممكن أتخيلها كأحمد.
لو المسلسل ده اتعمل منه جزء تاني بميزانية أعلى انا واثق إننا هنقضي معاه وقت أمتع من ده بكتير. روحوا اتفرجوا ع المسلسل وانتوا مطمنين ومن غير سقف طومحات في السما.. وانتوا بتتفرجوا ادعوا لدكتور أحمد خالد توفيق بالرحمة.
